انتي تعرفي إن الصراخ والزعيق في وش ابنك أخطر بكتير من الضرب؟
أيوه ، أخطر بمراحل، وتعالي أقولك إزاي…
لما بتزعقي لابنك بصوت عالي
إنتي بتفتكري إنك كده علمتيه الصح من الغلط، أو إنك وصلتيله الرسالة بشكل أسرع
لكن الحقيقة إن الطفل وقت الصراخ بيفقد إحساس الأمان تماماً.
❌ الصراخ مش بيوصل الرسالة، الصراخ بيدفن الرسالة وسط الخوف.
الطفل بيسمع صدى الصوت العالي أكتر ما بيسمع الكلام والرسالة نفسها.
زي بالظبط لو حد جه بيقولك على حاجه غلط انت عملتها لكن بيقولها وهو بيزعقلك ، انت مش هتركز مع الغلط اللي انت عملته لكن هتركز بس إنه (بيعلي صوته عليك وبيهينك) رغم أنه جاي يوعيك ، ما بالك بطفل لسه بيتعلم اصلا الصح من الغلط
💔 تأثير الصراخ على الطفل:
1️⃣ الخوف المستمر:
ابنك بيبدأ يعيش في حالة قلق، ويفكر بس في اللحظه أو الموقف اللي هتزعقيله فيه ، وكل ده بيزرع جواه توتر وخوف ممكن يفضل عايش بيه.
2️⃣ انعدام الثقة بالنفس:
كل مرة بتزعقيله، صوتك بيوصله إحساس: "أنا مش حلو ، أنا غلط ، أنا مش محبوب".
فتخيلي طفل صغير لسه بيتبني، يتزرع جواه إحساس إنه مش كويس ومش محبوب!
3️⃣ تأخر في التطور اللغوي والتفكيري:
الطفل اللي بيتعرض للصراخ كتير ممكن يواجه مشاكل في التعبير عن نفسه أو التفكير بهدوء. لأن مخه بيتعلم يشتغل في وضع "الخوف" مش في وضع "الأمان والإبداع".
4️⃣ ردود فعل عدوانية:
الطفل إللي بيتعرض للزعيق الكتير بيتحول لشخص عصبي ويزعق هو كمان.
يعني هو مش فاهم غير إن الصوت العالي وسيلة لحل المشاكل.
فبيكرر اللي شافه واتعلمه.
5️⃣ بعد عاطفي بينه وبينك:
كل مرة بتزعقي، بتبني جدار بينك وبينه
الجدار ده بيكبر يوم ورا يوم، لحد ما يكبر ويمنع عنه إن يحكيلك ويقربلك ، ونيجي نسأل بعدين خاصة في مرحلة المراهقة هو إبني ليه بعيد عني ومش بيحكيلي ولا يتكلم معايا.
6️⃣العناد أو الانطوائية:
الطفل اللي بيتعرض للزعيق والصراخ كتير بياخد طريق من الاتنين دول..
بيعاند ويزيد عناد كل مره عشان يقاوم الشعور ده
او بينسحب تماماً ويكون انطوائي.
طب إيه الحل؟
بدل الزعيق ، قربي واتكلمي بهدوء ، صوتك الهادي بيوصل رسالتك أسرع من أي حاجة تانيه.
انزلي لمستواه ، بصي في عينيه واطلبي منه أو احكيله ، ده غلط ليه والمفروض نعمل ايه وحتى لو فيه عقاب يبقى بنفس الطريقة ، لكن لما تعاقبي وانتي بتصوتي ، انتي كده بتعاقبي نفسك انتي وهو وصله ده وهيكرر نفس السلوك كتير
علميه بالحب مش بالخوف ، لأن الحب هو اللي بيبني شخصية سوية ، والخوف هو مجرد مسكن مؤقت فقط
فكري نفسك دايما بالكلمات دي "إبني طفل لسه بيتعلم وانا اللي بعلمه"